17. an 18. Mee 2025
zu Neimënster
den 17. a 18. Mee zu Neimënster
Kannerfestival, den 17. a 18. Mee, vun 10 bis 18 Auer
A 56 Ateliere kënnt Dir mat Äre Kanner spillen, kreéieren, entdecken, fuerschen an Iech esou op eng lëschteg a spilleresch Aart a Weis mat den Handlungsfelder vun der non-formaler Bildung vertraut maachen, déi an de Crèchen, Maison-relaisen, Foyeren, d'Dageselteren an Minicrèchë applizéiert ginn.
Stänn & Workshops
Loosst eis zesummen e liewegt Ëmfeld gestalten !
An eisem Atelier ginn d'Kanner invitéiert, op eege Fauscht ze entdecken an ze experimentéieren, fir souwuel gewéinlech wéi aussergewéinlech Phenomeener aus hirer Ëmwelt ze erliewen.
Fir Kanner vu 0 bis 12
4 workshops
Safari-Zauber
Wëllkomm bei der magescher Safari, wou deng Fantasie lieweg gëtt. An dësem interaktive Workshop erliewe Kanner wéi de green screen-Effekt funktionéiert. Wéi ass et wann ee plëtzlech mëtten am Dschungel, an der Savann oder an der Wüst ass? Mat kreativen Hannergrënn an direkt ugewanter Technik, kënnen d'Kanner a Fantasie-Welten andauchen. Ee Spaass fir kleng Entdecker, bei deem Staune garantéiert ass!
Fir Kanner ab 4 Joer
Natur-Spillplaz
D'Ekipp "Natur erliewen" guidéiert d'Kanner duerch d'Schéinheet an d'Villfältegkeet vun eiser Natur an eiser Ëmwelt. Et geet drëm, d'Natur an d'Ëmwelt zesummen ze erliewen an ze verstoen. D'Kanner dierfe kreativ ginn a mat ënnerschiddlechem Naturmaterial hier eege kleng Welt opbauen.
Fir Kanner ab 4 Joer
Entdeck d'Roboteren & Kreatiivt Upcycling
Entdeck d'Roboteren!
Maach éischt Schrëtt an der Welt vum Programméieren a logeschen Denken. Entdeck wéi spannend Programméiere ka sinn! D'Kanner kontrolléieren de Roboter fir d'éischt um Fernseh a programméieren en da fir en aus engem Labyrinth eraus ze kréien.
Kreatiivt Upcycling!
Al Textilien, déi eigentlech ewechgeheit solle ginn, ginn an e Porte-clé ëmgewandelt. D'Kanner entdecke wéi eng Bitzmaschinn funktionéiert a kënnen dës notze fir hire Porte-clé ze personaliséieren.
Fir Kanner ab 8 Joer
Geschicht vun der Arche Noah
Eng Arche aus Holz an upgecycelt selwer produzéiert Déiere gi benotzt fir mat Kanner iwwer d’Zesummeliewen an Diskriminéierung ze schwätzen. All Déier ass eenzegaarteg an huet ënnerschiddlech Eegenschaften. Den Hond ass vläit méi beléift wéi eng Spann. Si sinn awer all gläichwäerteg. Oder ass do ee méi wäert, wéi deen aneren? Vun den Déiere kann den Transfert op d’Mënsche gemaacht ginn.
Fir Kanner ab 6 Joer
3 workshops
Direction générale du secteur de l’enfance - Service de l'éducation et de l'accueil : Informatiounen a Sammelpunkt fir d’Äntwerte vum QUIZ iwwer d'non-formal Bildung
D’ Missioun vun der Direction générale du secteur de l’enfance ass d’ non-formal Bildung ze promovéieren an den administrativen an qualitativen Suivi vu Bildungs- a Betreiungsstrukturen (Maison Relais, Crèche, Minicrèche, Dageselteren, Foyer de jour, Foyer scolaire) ze assuréieren.
Den Service de l’éducation et de l’accueil kontrolléiert an entwéckelt de Finanzéierungssystem vun dëse Strukturen (Chèque-Service Accueil) weider, a këmmert sech ëm Reklamatiounen a Plainten.
Zéckt net, op eise Stand ze kommen, fir eis Froen ze stellen oder weider Informatiounen ze kréien.
D’Kanner, déi de QUIZ iwwer d’non-formal Bildung zesummen mat hiren Eltere gemaach hunn, sinn häerzlech invitéiert, e klengen Kaddo op eisem Stand ofhuelen ze kommen.
Service Eltereforum an BEE SECURE
D'Elterefore si Plazen, an deenen d'Eltere sech an engem frëndleche Kader begéine kënnen, a wou si an allen Dimensioune vun hirem Elteresinn ënnerstëtzt a gestäerkt ginn.Op mëttlerweil 9 Plazen hei am Land ginn den Elteren hei Plaze fir Austausch, Informatiounen a Form vu Coursen oder Ateliere, wéi och flott Aktivitéite fir Elteren a Kanner gebueden – dat onofhängeg vum Alter vun de Kanner.
Mat derbäi ass dëst Joer och en Expert vu BEE SECURE fir méi spezifesch Froen ronderëm Bildschiermer a Parental Control ze beäntweren.
Service fir Qualitéitsentwécklung an de Secteure vun der non-formaler Bildung an der Hëllef fir Kanner a Famillen
Dëse Service widmet sech der Qualitéitsentwécklung, an deem s en d’Strukturen dobäi ënnerstëtzt, eng qualitativ héichwäerteg Betreiung ze garantéieren, déi d’Wuelbefannen an d’Bildung vun de Kanner sécherstellt. Duerch eng enk Zesummenaarbecht tëschent dem Ministère an de Professionellen um Terrain, ginn innovativ Projeten entwéckelt déi d’edukativ Praktike beräicheren. D’Zil ass et, de Kanner en ureegend Environnement ze bidden, dat hire Virwëtz, hir Autonomie an hir Entwécklung fërdert. D’Famillje kënne sech domadden op gutt forméiert Personal a Strukturen verloossen, déi sech konstant weiderentwéckelen, fir de Kanner e sécheren a pädagogesch wäertvolle Kader ze bidden.
Bastel- a Molatelier
An dësem Atelier kënnen d'Kanner hir Kreativitéit ausdrécken, andeems si faarweg Maske bastelen, mat Kräid molen oder ee Button gestalten. Dësen Atelier fërdert net nëmmen déi artistesch Expressioun, d'Zesummenaarbecht an d'Experimentatioun mat verschiddene Materialien, mee erméiglecht et de Kanner och, hir Meenung fräi auszedrécken an dës op kreativ a sichtbar Manéier no baussen ze droen.
Fir Kanner ab 3 Joer
Bauatelier
D'Kanner bauen eng Dschungelwelt mat modulären Elementer a speziellen Tools. Duerch dës Aktivitéit léieren si logescht Denken, Kooperatioun a Kreativitéit, wärend si real Bautechniken entdecken. Zesumme kënnen si entscheeden, wéi se hir Dschungelwelt gestalten wëllen, Iddien mateneen austauschen an esou eng eenzegaarteg Welt erschafen.
Fir Kanner ab 6 Joer
Rätselatelier
An dësem Atelier entdecken d'Kanner déi faszinéierend Welt vun de Coden a geheime Noriichten. Si kënnen eng Decoderscheif bastelen, fir Botschaften ze entschlësselen, an och selwer codéiert Noriichten ze schreiwen. Eng spannend Aktivitéit, déi logescht Denken, Gedold a Kreativitéit op spilleresch Aart a Weis fërdert.
Fir Kanner ab 8 Joer
Super-Wal-Kiermes
D'Super-Wal-Kiermes ass e Kiermesstand, deen d'Demokratie thematiséiert. Dräi Spiller erlaben et, d'Demokratie op spilleresch Aart a Weis ze entdecken:
- Iddie fëschen
- Rad vun der Verännerung
- Zesumme bauen
D'Spiller gi vun Animateuren an Animatricen encadréiert, fir souwuel den Austausch mat de Participanten ze fërderen wéi och d'perséinlech Reflexioun unzereegen.
Spilleresch beweegen - Abenteuer am Beweegungscontainer
An eisem Beweegungscontainer entsteet en eenzegaartegen Erliefnisraum, an deem Kanner spilleresch nei Beweegungsformen entdecken, hir motoresch Fäegkeete stäerken a kreativ Léisungsweeër ausprobéiere kënnen.
Mat Elementer wéi dem Schwebetuch, engem abenteuerlechen Dschungelparcours, villsäitege Multigurten, engem erausfuerderende Kloternetz an engem lëftegen Airtunnel luede mir zum Kloteren, Schaukelen, a Balancéieren an. Beweegung gëtt hei zum Abenteuer!
De Workshop ënnerstëtzt eegestänneg Léieren duerch Beweegung, stäerkt Koordinatioun, Teamgeescht a Selbstvertrauen. An engem sécheren Ëmfeld kënnen d'Kanner hire Kierper op eng nei Aart a Weis kenneléieren, eege Grenzen entdecken an Erfolleg-Erliefnisser sammelen.
Fir Kanner vun 3 bis 12
Samschdes | Naturhandwierk “Filzen”
Mat faarweger Schofswoll, Olivenuelegseef a waarmem Waasser maache mir gefilzte Steng mat der Technik vum naasse Filzen. Dës Technik ass eng al a natierlech Handwierkskonscht, déi eng fir Entspanung suergt an de Rythmus vum Alldag ofbremst.
Et ass och eng nohalteg an ëmweltfrëndlech Praxis. D’ Steng gi an der Natur gesammelt, d’ Schofswoll ass e nohaltegt Material, an d'Olivenuelegseef ass eng biodegradéierbar vegetalesch Seef, déi d'Haut schount an ökologesch ass.
Wann d’ Kanner mat natierleche Materialien schaffen, ginn se fir de Wäert vun der Natur an hir Ressourcen sensibiliséiert. Gläichzäiteg entwéckelen si Selbstvertrauen, an si hu Spaass eppes mat hiren eegenen Hänn ze kreéieren – eppes “Selwergemaachtes”, dat si houfreg heembrénge kënnen.
Dës Aktivitéit ass scho fir Kanner ab 2 Joer zougänglech.
Sonndes | Zwerge schnëtzen
An dësem Atelier wäerten d'Kanner d'Natur-Handwierk "Schnëtzen" kenne léiere. Zesummen tauche mir an déi beandrockend Welt vun de Zwergen an, a schnëtzen zesummen aus engem Hieselter-Aascht een Zwerg! Dobäi begleede mir d'Kanner Schrëtt-fir-Schrëtt fir aus engem einfache Stéck Holz eng eenzegaarteg Kreatur ze schnëtzen. Dobäi kënne Kanner hirer Kreativitéit freie Laf loossen an als Kënschtler selwer entscheeden, wéi hiren soll Zwerg ausgesinn. Nom Schnëtze kënnen d'Kanner hiren Zwerg bemolen.
Fir Kanner vun 8 bis 12
D’Natur mat eise Sënner erliewen an entdecken
Vun a mat der Natur léieren. An eisem Workshop kënnen d’Kanner an hir Elteren d’Welt vum Buedem mat all deem Gudden, wat en ervirbréngt, entdecken. Richen, fillen, upaken, léiere, wéi ee Som planzt, Gaardegeräter benotzen, Planze fleegen ... D’Kanner wäerte vill Neies entdecken!
Si kréie Som a Buedem zur Verfügung gestallt an all Kand kann eppes an e personaliséiert Dëppe planzen.
D’Natur, eng Quell fir sënnlech a wëssenschaftlech Exploratioun
Wéi wär et, wa mir d’Wëssenschaften an d’Natur mat eise Sënner entdecken. Dës wëssenschaftlech Dëscher gi vun de Kanner selwer mat natierlechen a recycléierte Materialien gestaltet. Eis Jengst kënnen esou d’Welt vum Miir a vun der Äerd erfuerschen. Mir wäerte mat eise Sënner (taaschten, kucken, richen, lauschteren) ënnerschiddlech Materialien, Aspekter (fest, flësseg, mëll), Géigestänn an Elementer manipuléieren.
Këschte fir d’Sënner: Biotopen an Ëmschëdden
D’Fauna an d’Flora entdecken duerch d’Manipuléiere vun Objeten an Texturen! D’Këschte fir d’Sënner sinn en herrlecht Geschiir fir ze léieren; di jonk Kanner kënnen hei hir sensoresch Kapazitéiten an hir Feinmotorik entwéckelen. Mat natierlechen Elementer, déi d’Kanner op Spazéiertir gesammelt hunn, Biotope schafen, sensibiliséiert d’Kanner fir d’Ecosystemer vun eisem Planéit zu schützen.
Samschden, den 17. Mee : Museksatelier
Hei hunn d´ Kanner d’ Méiglechkeet mat ze sangen, nei Lidder kennenzeléieren an Instrumenter auszeprobéieren.
Sonnden, den 18. Mee : Wierkstattatelier : Ee 'Wuesunhänger' bastelen
D’ Kanner kréie Käerzen déi brennen, an si loossen de waarme Wues an eng Form drëpsen déi duerno an eng Schossel mat kalem Waasser geluecht gëtt. De Wues gëtt am kale Waasser haart a gëtt zu engem Kettenunhänger. D’ Kanner kënne och faarweg Käerzen benotzen, fir ee personaliséierten, kreativen an eenzegaartegen Unhänger ze produzéieren.
vun 4 bis 12 Joer
1 workshop
BIBLIOBUS - CJF
De Bibliobus-CJF, e Ressourcezenter, ënnerstëtzt d’Elteren bei der Sproochentwécklung vun hire Kanner. Als éischt Sproochvirbiller hunn d’Elteren eng entscheedend Roll an dësem Léierprozess. All Alldagssituatioun – beim Iessen, beim Spill oder bei engem Spadséiergang – bitt eng Geleeënheet, ze schwätzen, Geschichten z'erzielen an de Wuertschatz ze erweideren. Einfach an ëmsetzbar Strategien hëllefen, d’Mehrsproochegkeet ze fërderen an d‘fréit sproochlecht Erwächen ze ënnerstëtzen.
Fir Kanner vu 0 bis 4
Domino
D'Sprooch – E wichtegt Instrument fir d'Zukunft vun Ärem Kand.
Mat DOMINO léieren d‘Elteren op spilleresch Aart a Weis de Konzept vun der SEA kennen an entdecken, wéi wichteg d'Sprooch fir d’Entwécklung vun hirem Kand ass. Eng gutt Sproochbeherrschung fördert d'Ausdrocksfä egkeet, d'Verständnis an de schoulesche Succès.Fir de Wuertschatz ze beräicheren an d’Mëndlechkeet ze fërderen, ass et wichteg, mat dem Kand ze schwätzen: oppen Froen ze stellen, Geschichten ze erzielen, ze sangen. Gesten, Mimiken an Intonatiounen maachen d’Léieren lieweg. Dës Methoden sin liicht an den Alldag z’integréieren a maachen d’Léieren natierlech a spilleresch.
Fir Kanner vu 6 bis 12
Memoryspill
Mam pädagogesche Memoryspill, wou eng Kaart e Bild weist an déi aner en Text, entdecken d‘Elteren op eng spilleresch Manéier, wéi d‘Sprooch sech beim Kand entwéckelt. Dës Aktivitéit illustréiert de SEA-Usaz, deen op intuitiivt Léieren a Spill opbaut. Si weist, wéi dës Interaktiounen de Wuertschatz beräicheren an d’kognitiv Entwécklung ënnerstëtzen. Esou verstinn d’Elteren eis pädagogesch Approche besser, déi op en natierlecht Léiere fokusséiert.
Fir Kanner vu 4 bis 6
Atelier Recycle Art
An dësem Atelier, inspiréiert vum Arno Stern sengem “Molspill”, entdeckt Dir d’ Konscht op eng fräi an intuitiv Manéier. Mat Pannoen aus recycléierten Objeten kënnen d’ Kanner, Texturen, Faarwen a Formen entdecken a si ginn fir d’ Ëmweltbewosstsinn sensibiliséiert. Eng eenzegaarteg artistesch Entdeckungsrees, déi de fräien Ausdrock an d’ Selbstvertrauen fërdert.
Ab 2 Joer
Atelier Céra-Main
An dësem Atelier entwéckele Kanner hir Feinmotorik, andeems si alldeeglech Objeten aus Keramik kreéieren. All Participant personaliséiert säi Wierk, a seng Kreativitéit a Konzentratioun gi gefërdert. Dëse Workshop fërdert den individuellen Ausdrock, d’ Kreativitéit an d’ Entdeckung vun Handwierktechniken an der Konscht, wärend och d’ Nohaltegkeet vun de Wierker an de Mëttelpunkt gesat gëtt.
Ab 4 Joer
Atelier "D’ Schätz vun der Natur"
Gitt Äre Kanner eng kreativ an edukativ Erfarung, fir si fir de Naturschutz ze sensibiliséieren. Mat gedréchente Blummen gestalten si eenzegaarteg Objeten a léieren dobäi, wéi wichteg et ass, eis Biodiversitéit ze schützen. Dësen Atelier kombinéiert Kreativitéit, Ëmweltschutz an Ëmweltbewosstsinn, fir op enger spillerescher Aart a Weis de Wäert an d’Schéinheet vun der Natur schätzen ze léieren.
Ab 2 Joer
Den Atelier fir d’ Emotiounen op verschidde Sproochen
An dësem Raum kënnen d’ Familljen zur Rou kommen, an zesumme léieren, wéi si Emotioune bewosst a konstruktiv geréiere kënnen. Entdeckt eis méisproocheg Léierinstrumenter, déi Iech dobäi ënnerstëtzen, d’Emotioune vun de Kanner besser ze verstoen an se léisungsorientéiert ze begleeden. Dir fannt och eraus, wéi Dir dës Hëllefsmëttel op eng natierlech a spilleresch Manéier an Ären Alldag integréiere kënnt, fir e méi harmonescht Zesummeliewen ze fërderen.
Vun 0 bis 12 Joer
Beweegungsentdecker
Dësen Atelier kombinéiert Beweegung mat engem Hindernisparcours fir strategescht Denken ze fërderen . D’ Kanner ginn encouragéiert, mat hire Matspiller zesummen ze schaffen. Doduerch stäerken d’ Kanner net nëmmen hiert strategescht Denken, mee och hir Kommunikatiouns- a Kooperatiounsfäegkeeten. Eng spilleresch an dynamesch Erfarung, déi d’ Selbstvertrauen stäerkt an den Teamgeescht fërdert.
Ab 4 Joer
Bastelen, rëselen, entdecken, léieren
Bastelt Är eege sensoresch Fläschen zesumme mat Ärer Famill! Kombinéiert kleng Elementer – Pärelen, Bänner, Bommelen oder souguer faarwege Sand – mat Waasser a kreéiert eng schéi sensoresch Fläsch fir mat heem ze huelen.
Ab 4 Méint
Zesummen, loosse mir et bléien!
All Blat an all Blumm, déi op dëse Bam kënnt, symboliséiert en Dram, e Wonsch oder e gléckleche Moment. Füügt Är eege Faarftouch derbäi a hëlleft eisem gemeinsame Bam ze wuessen!
Ab 4 Méint
De sensoresche Gaart
Wéi wier et, d’ Fréijoer op eng ganz nei Manéier ze entdecken? Taucht Är Hänn an eng Welt vu Strukturen, Parfumen a Faarwen an erliewt eng sensoresch Rees an d’Blummenzäit!
Ab 6 Méint
Samschdes | 10:00 – 14:00D' Blummefabréck
Blumme wuessen net nëmmen an de Gäert… si bléien och tëscht dengen Hänn! Komm, bastel deng eege Blummen, oder e schéine Blummebracelet an entdeck nach vill aner spannend Aktivitéiten.
Ab 3 Joer
Samschdes | 14:00 – 18:00 : De kreative Labo
Faarwege Slime, Experimenter mat an enger Portioun Kreativitéit… Hei gëtt gemëscht, transforméiert a kreéiert – an dat mat vill Spaass! Probéiert ongewéinlech Materialien aus a maacht Är eege Kreatiounen fir mat heem ze huelen.
Ab 2 Joer
Sonndes | 10:00 – 14:00 : Déi spilleresch Palette
Molen, awer mat ongewéinlechen a natierlechen Tools, eng sensorësch Täsch mat iwwerraschenden Texturen a fräi sinn fir Är eege Dekoratiounen ze kreéieren. Hei gëtt mat Faarwen a Gefiller gespillt!
Ab 4 Méint
Sonndes | 14:00 – 18:00 : Natur- a Molatelier
Vun der Fabrikatioun vun enger Vullefudder Haischen bis zu neie Moltechniken oder kreative Blummendekoratiounen – du kanns wielen ! Maach bei eng oder méi Aktivitéiten mat a géi mat enger schéiner Erënnerung heem.
Ab 3 Joer
Den TOTO-Bus an seng Tournée 2025: „Faarweg Telleren, faarwegt Liewen“
Den TOTO-Bus an seng Tournée 2025: „Faarweg Telleren, faarwegt Liewen“ steet ganz am Zeeche vun der Ernierung an dem Wuelbefanne vun de Kanner. Am Tasting Lab, engem interaktive Raum, entdecken d’Kanner d’Welt vun der Ernierung, erliewen ënnerschiddlech Goûten a reflektéieren iwwer hir Iessgewunnechten. Eng spilleresch an immersiv Approche, fir hire Virwëtz ze erwächen, si ze encouragéiere bewosst Choixen ze treffen an si fir d’Virdeeler vun enger gesonder a equilibréiert Ernierung ze sensibiliséieren!
Fir Kanner vu 4 bis 12
3 workshops
Trau dech!
Egal ob et drëms geet, duerch en däischteren Tunnel ze krauchen, am Waasser dat net déif ass no engem Géigestand ze sichen, sech an engem frieme Raum ze orientéieren oder op enger Bün virun engem Publikum ze sangen – all dës Defien erfuerderen Courage an Iwwerwannung!
Fir Kanner vu 6 bis12 Joer
Wat ass eigentlech Courage?
Am Kuppelzelt kënnen d'Kanner zesumme mat hiren Elteren doriwwer nodenken, wat Courage wierklech bedeit, a dës Bedeitung mat enger Schreifmaschinn op Pabeier tippen.
D' fäerdeg Texter weisen déi villfälteg Gedanken, déi entstinn, wann een sech mat dësem Thema auserneesetzt. Vläicht hëlleft eise Kanner, mee och eis, ons am Alldag méi zouzemudden!?
Partizipatioun, Emotiounen, Sprooch, Kreativitéit
Vu 7 bis 100 Joer
Op Är Plazen, prett a lass!
Ob et drëms geet, op engem Seel d’ Gläichgewiicht ze behalen, op Stelzen ze lafen oder vun engem Sprangtuerm ze sprangen – et braucht ee Courage, fir dës Erausfuerderungen unzegoen!
Kiermesspiller
An dësem Atelier ginn nieft ënnerschiddleche Kooperatiounsspiller, wéi Fallschiermsspiller oder de Fröbel-Tuerm, och nach aner bekannte Kiermesspiller ugebueden.
Dës Spiller goufen an de leschte Méint vun de Kanner aus eise Strukturen a verschiddenen Holz- a Konstruktiounsatelieren erstallt.
D’ Kanner kréien hei d’ Geleeënheet, verschidde spilleresch Aktivitéiten auszeprobéieren, wéi z. B. dat analogt Super Mario Spill wou mam Ball op en Zil geschoss gëtt, d’ Intefëschen an nach vill méi.
Fir Kanner vun 3 bis 12
5 workshops
Snoezelen, en Atelier fir all Sënner
An dësem Workshop hunn Elteren a Kanner d’ Geleeënheet, hir Sënner op eng spilleresch Aart a Weis ze erwächen. E speziell ageriicht Snoezelen-Zelt schaaft e gemittlecht Ëmfeld, dat sensoresch Erfarungen erméiglecht an d’ Entwécklung vun de Sënner ënnerstëtzt.
Ettlech Stoffer a verschidde Faarwen an Texturen, e Massage-Set, Bäll a Sënnesfläschen lueden zum Entdecken an Erliewen an.
Empathie Poppen, déi een oft an dëse Raimlechkeete fënnt, ginn och zu Verfügung gestallt.
Fir Kanner vu 0 bis 12
E kreativen Dësch
Hei kënnt Dir um Kreativ-Dësch Är Fantasie spilleresch ausliewen! Verschidde Materialie stinn zur Verfügung, fir Är Iddien an eenzegaarteg Wierker ëmzesetzen – vu klasseschem Bastelmaterial bis hin zu natierlechen Elementer. Loosst Ärer Kreativitéit fräie Laf an entdeckt d’Freed um Gestalten!
Soubal d’Kand matmaache wëll, oder ab 2/3 Joer
Rees duerch d’Konscht
Bicher, Biller, Objeten: Kommt bekannt Konschtwierker nei oder rëm entdecken! Eng spilleresch an interaktiv Rees duerch d’Konscht, bei där de Spaass net ze kuerz kënnt.
Fir Kanner vu 0 bis 12
Workshop fir sech kierperlech auszedrécken
An eisem Raum fir kierperlech Ausdrockweisen, dee speziell fir Kanner geducht ass, gëtt Beweegung zu enger kënschtlerescher Sprooch! Inspiréiert vu berüümte Konschtwierker entdecken d’Kanner hir Kreativitéit op spilleresch Aart a Weis, wéi duerch Danz, Mimik a kierperlecht Spill.
Fir Kanner vu 0 bis 12
Bauen
Looss mat ënnerschiddleche Baumaterialien denger Kreativitéit fräie Laf!
Fir Kanner vu 0 bis 12
Natur-Expo
Wéi gesinn d’ Kanner d’ Natur? Entdeckt hir herrlech Fotoen, wou si d’ Magie vun de Joreszäiten an d’ Verännerungen an der Natur afänken. Loosst Iech vun dëser Ausstellung an eisem Aktiv'Bus verzauberen!
Fir all Alter
Entdeckt eng Welt wou Dir fuersche kënnt
Erlieft, zesumme mat Ärem Kand, wäertvoll Momenter mat ville sensorëschen Erfarungen. Liicht, Téin a verschidde taktil Impulser erwächen d’ Sënner a stimuléieren d’ Fantasie. Profitéiert vun dëser eenzegaarteger Geleeënheet, fir zesummen Är Kreativitéit fräi auszeliewen.
Fir Kanner vu 0 bis 2 Joer
Rees ronderëm d’ Welt
Der Welt méi no kommen: Huelt un engem flotten Abenteuer deel, an entdeckt op eng spilleresch Aart a Weis déi verschidde Kulturen déi et gëtt. Loosst Iech iwwerraschen wann Dir op d’ Entdeckungsrees gitt !
Dës Aktivitéit hëlleft de Kanner, sech fir d’ Diversitéit vun de Kulturen opzemaachen, hiert Wëssen ze erweideren an e bessert Verständnis vun der Welt ze entwéckelen.
Beim Erfuerschen vun de verschiddene Kulturen hannerloossen d’ Kanner a Famillen och hir eegen Spueren : duerch hir Kreativitéit a Matgestaltung beräicheren si eis Welt mat hiren Iddien a maachen se nach méi faarweg a lieweg.
Fir Kanner vu 0 bis 12
Meng Sprooch, Meng Wierder, Meng Wuerzelen
Elteren a Kanner kënnen zesummen de Saz "There's no place like home" an hir jeeweileg Sproochen iwwersetzen. Jidderee ka nach aner Wieder oder Ausdréck dobäisetzen, jee no Interessie, Inspiratioun oder Preferenzen.
Dësen Atelier setzt all d’ Sproochen déi d’ Kanner schwätzen an de Mëttelpunkt. All Sprooch ass eenzegaarteg: Si spigelt eis Identitéit erëm, hëlleft eis d’ Welt besser ze verstoen an eis fir nei Saachen opzemaachen.
Mat de Sproochen ka jiddereen sech ausdrécken, Bezéiungen opbauen a mat senger Ëmwelt a Gesellschaft a Kontakt trieden.
Hëlleft eis, eng "Mauer vun de Sproochen", déi d’ Diversitéit vun eiser Welt erëmspigelt, ze gestalten !
Fir Kanner ab 6/7 Joer
Den Handwierker vun der Welt
An eisem Basteleck kënnen d' Kanner hir eegen Iddien ëmsetzen an aus natierlechen a recycléierten Materialien verschidde Gebaier, Päss, Fändelen, Zeechnungen oder Personnagen aus der ganzer Welt gestalten.
Dësen Atelier bitt de Kanner d’ Méiglechkeet, d’ Schéinheet an d’ Diversitéit vun eiser Welt op eng spilleresch Aart a Weis ze entdecken.
Dësen Atelier soll d’ Kanner op déi kulturell a geografesch Facettë vun eiser Welt opmierksam maachen.
Fir Kanner vu 0 bis 12
Mat de Sënner léieren : entdecken, bauen, upaken, sech entfalen!
Äert Kand entdeckt véier thematesch Sënneskëschten : Recyclage mat Orbeez, Exploratioun vun de Buchstawen am Sand, Gaardenaarbecht mat Bounen a Steng, déi Waasser imitéieren, an d’Entdeckung vu Faarwen mat Lënsen a Bijouen. All Këscht ass entwéckelt, fir seng Virwëtz ze erwächen an d’Sënner vum Beréieren, Gesinn a Fantaséieren ze stimuléieren.
Dës immersiv Aktivitéit fërdert d’Kreativitéit vun Ärem Kand, wärend seng feinmotoresch a kognitiv Fäegkeete gestäerkt ginn. Beim Ëmgang mat de Materialie an der Interaktioun mat de verschiddenen Themen entwéckelt et Kompetenzen am Zortéieren, Entdecken a Nodenken, wärend seng Autonomie a Kreativitéit gefërdert ginn. Eng spilleresch Léiererfarung, fir seng Observatiouns-, Reflexiouns- a Problemléisungsfäegkeeten ze stimuléieren.
Dës Aktivitéit ass fir all Alter gëeegent. Allerdéngs gëtt fir déi Kleng d’Präsenz vun engem Erwuessenen recommandéiert, fir si an der Exploratioun ze begleeden an drop opzepassen, datt si d’Elementer net an de Mond huelen.
Fir Kanner vu 0 bis 12 Joer
De Waasserparcours: Erlieft d'Wëssenschaft duerch d' Beweegung!
Bitt Ärem Kand eng spilleresch a pädagogesch Erfarung mat eisem interaktiven Waasserparcours! Duerch dëst sensoresch a wëssenschaftlecht Spill kann Äert Kand Waasser manipuléieren, säi Wee beobachten a seng Bewegung duerch verschidden Hindernisser experimentéieren.
Dës Aktivitéit fërdert d’Virwëlz, d’Motorik an d’Iwwerleeung, wärend se op eng spilleresch a verständlech Manéier d’Grondlage vun der Waasserphysik vermëttelt. Eng flott Geleeënheet, fir Spaass ze hunn!
Dës Aktivitéit ass fir all Alter gëeegent, mat altersgerechten Entdeckungsniveauen, souwuel fir déi Kleng wéi och fir déi Grouss.
Fir Kanner vu 0 bis 12 Joer
Fill dech duerch d’Natur
„Fill dech duerch d’Natur“ ass eng spannend Aktivitéit fir d’Kanner an hir Elteren, bei där si d’Natur mat alle Sënner entdecken. Op eng spilleresch Aart a Weis kënne si verschidde Naturmaterialien ertaaschten a spieren, an dat mat Hänn a Féiss. Dobäi leieren si de Liewensraum Natur mat alle Sënner wouer ze huelen.
Fir Kanner vu 0 bis 12
SOS am Bësch
"SOS am Bësch" ass eng Aktivitéit, bei där d’ Kanner léieren, wéi se sech an enger Noutsituatioun am Bësch richteg verhale sollen. Si gi begleet fir erauszefannen, wéi een Verletzungen erkennt, wéi een Éischt-Hëllef-Moossnamen uwent a wéi ee richteg reagéiert. D’ Kanner üben wichteg Fäegkeeten, wéi d’ Verbänn uleeën, d’ Geforen erkennen an Hëllef ruffen. Dës Aktivitéit fërdert och d’ Selbststännegkeet an den Ëmgang mat méiglechen Noutfäll an der Natur.
Fir Kanner vu 7 bis 12
Gëff kreativ
"Gëff kreativ" ass eng lëschteg Bastelaktioun, wou d'Kanner hir Fantasie mat Naturmaterialien entfale kënnen. Si sammele Blieder, Äscht, Steng an aner Materialien aus der Natur a benotzen dës fir hir kreativ Kunstwierker ze gestalten. Dobäi ginn d'Kanner opgefuerdert, hir eege Kreativitéit auszedrécken, hir Feinmotorik ze stäerken an e bessert Versteesdemech fir d'Natur ze entwéckelen.
Fir Kanner vu 2 bis 12
Ech halen d'Natur propper
"Ech halen d'Natur propper" ass eng léierräich Aktivitéit, wou Kanner nobruecht kréien, wéi wichteg et ass, hiren Dreck richteg ze entsuergen. Si kreien erklärt, wat an wéi eng Poubelle gehéiert - vum Pabeier iwwert de Plastik, bis zum Biomüll - a wisou et schiedlech ass, Ofall einfach op de Buedem ze geheien.
D'Kanner entwéckelen e Bewosstsinn fir Ëmweltschutz an hëllefen aktiv, hir natierlech Ëmgéigend propper ze halen.
Fir Kanner vu 3 bis 12 Joer